Tovuzda “Zəfər Günü”nə həsr olunmuş bilik yarışı keçirilib
Tovuz Rayon İcra Hakimiyyətinin, Qazax-Tovuz Regional Gənclər və İdman İdarəsinin Tovuz rayon üzrə Gənclər və İdman sektorunun və Tovuz Gənclər Evinin birgə təşkilatçılığı ilə 8 Noyabr- “Zəfər Günü”nə həsr olunmuş intellektual bilik yarışması keçirilib.
İlk olaraq Azərbaycan Respublikasının Dövlət Himni səsləndirilib, Ulu Öndər Heydər Əliyevin və vətənimizin bütövlüyü uğurunda canını fəda edən şəhidlərimizin əziz xatirələri bir dəqiqəlik sükutla yad edilib.
Yeddi komandanın iştirak etdiyi gərgin bilik mübarizəsi şəraitində keçən intellektual yarışda 35 gənc iştirak etmişdir. Yarış zamanı I yerə Azərbaycan Qızıl Aypara Cəmiyyətinin Tovuz rayon Bölməsinin “Turan” komandası, II yerə “Flaqman” komandası, III yerə isə Tovuz Dövlət Sosial-İqtisad Kollecinin “Gənc Müəllimlər” komandası layiq görülüb.
Qalib komandalar Qazax-Tovuz Regional Gənclər və İdman İdarəsinin fəxri fərmanları ilə təltif olunublar.
