Tovuzda Gənc Sahibkarların III Forumu keçirilib

2022-ci il üçün “Gənclər paytaxtı” seçilmiş Tovuz rayonunda gənclərin ictimai-siyasi, sosial-iqtisadi və mədəni həyatda fəal iştirakını təmin edən, onların intellektual və yaradıcılıq potensialını artıracaq tədbirlər həyata keçirilir.

Gənclər və İdman Nazirliyi, Kiçik və Orta Biznesin İnkişafı Agentliyi  və Gənclər Fondunun birgə təşkilatçılığı ilə bu gün Tovuz şəhərində keçirilən Gənc Sahibkarların III Forumu belə tədbirlərdən biridir.

 Forumun keçirilməsində məqsəd gənclər arasında sahibkarlıq fəaliyyətinin təşviqi, mövcud dövlət dəstəyi mexanizmləri barədə onların məlumatlandırılması, yeni imkanlar və çağırışlar barədə fikir və təkliflərinin öyrənilməsi olub.

Tədbirdə gənclər və idman naziri Fərid Qayıbov, Tovuz rayon İcra Hakimiyyətinin başçısı Məmməd Məmmədov, Gənclər Fondunun İcraçı direktoru Fərid Cəfərov, Dövlət Məşğulluq Agentliyinin İdarə Heyətinin sədri Mustafa Abbasbəyli, Sahibkarlığın İnkişafı Fondunun İdarə Heyətinin sədri Osman Xaliyev çıxış ediblər.

Forumun rəsmi açılış mərasimindən sonra müxtəli mövzularda panel müzakirələr və uğur qazanmış gənclər çıxış ediblər. Əsas başlığı “Gənc sahibkarlara dövlət dəstəyi: imkanlar və çağırışlar” mövzusunda olan panel müzakirələrdə Kiçik və Orta Biznesin İnkişafı Agentliyi, Dövlət Məşğulluq Agentliyi, Kənd Təsərrüfatı Nazirliyi yanında Aqrar Kredit və İnkişaf Agentliyi, Sahibkarlığın İnkişafı Fondu, Ailə Biznesinə Asan Dəstək publik hüquqi şəxsi və Dövlət Vergi Xidmətinin məsul əməkdaşları öz qurumlarının gənc sahibkarlarla bağlı həyata keçirdiyi işlər və sahibkarlara dövlət dəstəyi mexanziçləri barədə iştirakçılarla birgə müzakirələr aparıblar.

Forum TEDx formatında “Maliyyə sektorunun gələcəyini texnologiya necə dəyişəcək”, “Sadə idarəetmə” mövzusunda təqdimatlarla davam edib.