“15 sentyabr Bilik Günü”nüz mübarək!

Azərbaycanda 15 sentyabr tarixi Bilik günu kimi qeyd olunur. Prezident İlham Əliyevin 21 avqust 2004-cu il tarixli fərmanına əsasən Azərbaycanın bütün təhsil müəssələrində dərslərin 15 sentyabrdan başlanması qərara alınıb və beləliklə həmin gün bilik günü kimi qeyd olunur. Bilik günü məktəb həyatına qədəm basan birincilər üçün səbirsizliklə, sevinc və həyacanla gözlənilən, xüsusi qayğı və məmnuniyyətlə, təntənəli şəkildə qarşılanacaqları bir gündür.

Dövlətimizin təhsil müəssisələrində savadlı, bilikli, vətənpərvər, geniş dünya görüşlü, nümunəvi əxlaqa malik insanlar yetişir. Bu insanlar isə cəmiyyəti daha da inkişaf etdirirlər. Son illərdə Azərbaycan təhsili yeni inkişaf dövrünə qədəm qoyub. Prezident İlham Əliyevin və Birinci Vitse prezident Mehriban xanım Əliyevanın təhsil sahəsinə diqqət və qayğısı  Ulu Öndərin təhsil siyasətinin uğurlu davamının göstəricisidir. Bir faktı xatırlatmaq kifayətdir ki, ölkəmizdə təhsil sisteminin bütün pillələri üzrə dövlət proqramları uğurla həyata keçirilir. Azərbaycan təhsilində ən uğurlu nəticələrdən biri məktəb tikintisinin geniş vüsət almasıdır. Tovuz rayonunun timsalında da bunu aydın görmək olar. Belə ki, cənab Prezidentin hakimiyyətə gəldiyi gündən başlayaraq 24 məktəb binası yenidən tikilib və ya təmir olunub, 32 məktəb binası təmir olunub, 5 məktəbdə əlavə korpuslar tikilib və 17 dağ kəndimizə modul tipli təhsil müəssisəsi tikilib, təhsilalanlar üçün hər cür şərait yaradılıb, müasir avadanlıqlarla təchiz olunubdur.

Beləliklə, istər məktəbəqədər, istərsə də ümumi və ali təhsilin inkişafı istiqamətində həyata keçirilən islahatlar sayəsində təlim-tədris şəraiti daha da yaxşılaşdırılır. Bu da öz növbəsində, təhsilin müasir dövrün tələblərinə uyğunlaşdırılmasına zəmin yaradır.

Əziz müəllimlər, şagirdlər və valideynlər sizi 15 sentyabr - Bilik günü münasibətilə  Tovuz Rayon İcra Hakimiyyəti kollektivi adından ürəkdən təbrik edirik.

Yeni tədris iliniz uğurlu olsun!