Tovuzda "Aqrar sahədə qadınların iqtisadi güclərinin artırılması" layihəsi çərçivəsində görüş keçirilib
Tovuz Dövlət Aqrar İnkişaf Mərkəzində “Aqrar sahədə qadınların iqtisadi güclərinin artırılması" (ASQİGA) layihəsi çərçivəsində layihə benefesiarları ilə görüş keçirilmişdir.
Görüşdə Aqrar Kredit və İnkişaf Agentliyinin (AKİA) sədr müavini Leyla Məmmədova, AKİA Beynəlxalq təşkilatlar və maliyyə qurumları ilə əməkdaşlıq sektorunun müdiri Teymur Nağıbəyli, FAO- Azərbaycan Tərəfdaşlıq Proqramının rəhbəri Namiq Məmmədov, layihənin rəhbəri Flora Poladova, Tovuz rayon DAİM-in rəhbəri Emin Eyvazov və Tovuzlu qadın fermerlər iştirak etmişlər.
Görüşün məqsədi benefisiarların layihə çərçivəsində göstərilən dəstəkdən necə yararlandıqlarını və daha hansı tekniki dəstəklərə ehtiyaclarının olmasını müzakirə etmək və qadın fermerlərin təkliflərini dinləyib onlara gələcək dəstəyin müəyyən olunmasıdır.
Kənd Təsərrüfatı Nazirliyinin beynəlxalq əməkdaşlıq çərçivəsində həyata keçirdiyi layihə FAO və Kənd Təsərrüfatı Nazirliyi yanında Aqrar Kredit və İnkişaf Agentliyi (AKİA) tərəfindən icra olunur.
Layihənin əsas məqsədi kənd qadınlarına innovativ texnologiyalar və bazara çıxış sahələrində texniki bilik və bacarıqlarını artırmaqda dəstək vermək, eyni zamanda iqtisadi imkanlara bərabər çıxışı əldə etmək, həmçinin kiçik təsərrüfat sahələrini inkişaf etdirərək ərzaq təhlükəsizliyini yaxşılaşdırmaqdır.
